2024 թ. մայիսի 4-ին, 11-ին և 18-ին (հաջորդական շաբաթ օրերին), ժամը 16:00-ին Հայ-Ռուսական համալսարանի Օրբելու լսարանում (նոր մասնաշենք, 7-րդ հարկ) տեղի կունենա The State of Modern Computation վերնագրով սեմինար, որի ընթացքում կպատմեմ ժամանակակից հաշվողական տեխնոլոգիաներում արագ զարգացող նոր մոտեցումների ու խնդիրների մասին:
Գաղտնիք չէ, որ ժամանակակից հաշվողական պահանջների մեծ մասն այսօր գալիս է մեքենայական ուսուցման կողմից, որում առանցքային է հանդիսանում մատրիցների բազմապատկման գործողությունը։ Ընդունելով դա որպես ելակետ, մասնավորապես, մանրամասն կուսումնասիրենք, թե այն արդյունավետ իրականացնելու համար ինչ մոտեցումներ են կիրառվում ալգորիթմա-ծրագրային, ճարտարապետական, միկրոէլեկտրոնիկական և նյութագիտական մակարդակներում ինչպես արդեն այսօր, այնպես էլ հավանական մոտ ապագայում։
Կանդրադառնանք նաև բազմաթիվ այլ թեմաների ու խնդիրների, որոնցից շատերը անմիջապես կապված ու կիրառելի են Հայաստանում մեծ ներկայություն ունեցող` EDA ոլորտի հետ (Synopsys, Siemens, Microchip, և այլ), որոնց աշխատանքի էական մասն այսօր նույնպես ուղղված է ժամանակակից մեքենայական ուսուցման համար անհրաժեշտ տեխնոլոգիաները սպասարկելուն:
Այլ կերպ ասած՝ սեմինարը ML Engineering / Data Science ոլորտների գործիքակազմը (TensorFlow, PyTorch, JAX) սպասարկող ստորին՝ ենթակառուցվածքային տեխնոլոգիաների մասին է, որոնցից առաջինում աշխատում է նաև Grid Dynamics ընկերության մեր թիմը՝ Google ընկերության հետ համատեղ՝ OpenXLA պրոյեկտի շրջանակներում՝ AI ոլորտում առաջատար այլ ՏՏ ընկերությունների հետ միասին:
Նյութը նախատեսված է ՏՏ և ֆիզիկա-մաթեմատիկա-ինժեներական ֆակուլտետների ուսանողների համար, բայց մուտքն ազատ է թեմայով հետաքրքրված բոլոր ցանկացողներին։ Սլայդերը կլինեն անգլերեն, ելույթը՝ հայերեն:
Մասնակցության համար կարող եք գրանցվել այս հղումով։
